العض عند الخيل
هنتكلم اليوم عن موضوع العض او السقوط من على الخيل بسبب بعض الناس محبين الخيل ولكن لم يتم التعامل معها عن قرب فممكن يتكون عندهم صورة غلط عن الخيل او سلوك الخيل وطبيعة تكوينه نفسياً
هل الخيل حيوان شرس او مفترس اوآكل لحوم ؟!
طبعاً لأ..الحصان فريسة اصلا وليس مفترس وبيتغذي على العشب والنباتات..
امال ايه اللى احنا بنشوفه زى الفيديو ده مثلا اوبنسمع عنه
اى حالة عض او رفس او سقوط في الخيل سببها الاول والاخير الانسان بقلة خبرة وعدم معرفة التعامل مع الخيل .
طبعاً الكلام هنا عن الخيل الموجودة معانا ومولودة فى وسط بشر سواء في مزارع خيل او اتربت مع افراد
بالنسبة الى العض عندالخيل فى الغابة هجوم على بشر او خيل بتهجم على بعضها دى اسبابها اكتر من تلاته واسبابها حاجة تانية خالص غير متعلقة بتربية الانسان ليها وان كان يجب معرفة ودراسة سلوك الحيوان في البرية علشان اعرف طبيعته وسلوكه معايا كمربي .
اى حالة عض بتشوفها هى واحدة من التلاتة ….
الحالة الاولى …
مهر اتولد اتفطم او قبل مايتفطم عنده شخصية قوية وبيلعب ببفمة هنا قولنا ايه بيلعب ،مهر شقى ، في شقاوة شوية وجرأة ممكن نعالجها وممكن تفضل فيه وممكن تتطور للحالة التالتة اللى هنتكلم عنها
المهر اللى بيلعب ببفمةعباره عن طفل شقي جدا ساعات مثلا تروح زيارة لواحد صاحبك عنده ابن جرئ شوية في التعرف على الناس واللعب معاهم وفي الغالب بيلاقي قبول وحب كبير بين الناس فممكن تلاقى ابوه بيقدم ليك نصيحة يقولك متخلهوش….. ياخد عليك …..هى دى نلعب ،نخرج،نفرغ طاقة ،كل ده تحت امرى انا ، بس لازم يبقي في حدود انا عمك لازم يعرف انك انت القائد وقادر على ردعة في اى وقت والعقاب هنا بيكون مناسب للفعل وبدون عصبية منك وعقب اللعب مباشرةً ولما تضرب على فمة تصيب مينفعش يهرب منك
يعنى المهر هيلعب بفمة داخل تجيبه من البوكس او بتمشيه على ايدك
اولا عقاب مباشر بعد الفعل مينفعش تروح وتيجى تضربه حتى لو فرق دقيقة
ثانيا مناسب على الفعل يعنى ضربه واحده تكفي وبدون عصبية منك …
في الحالة دى ممكن يبطل اللعب او يحتاج منك ممارسة وتدريب على طول ودى لا تعيب الحصان او المهر في شئ لو العادة استمرت فيه المهم ميطورش معاك الموضوع للحالة التالتة.
الحالة التانية
ده حصان تحت ضغط لو تلاحظ اكبر دليل على كلامى ان الخيل اصلا مش كائن هجومى ان ٩٠ % من فيديوهات العض كلها زى الفيديو حصان بيهجم يعض ويجرى لانه اصلا مش بياكل لحمه
كل حكايته عايز يفك الضغط اللى عليه بس ، سواء ضغط نفسي او بدنى او انه عارف ان في جهد او مشقة هتقع عليه
حصان بتحمل عليه جهد مرة واحدة بدون تدرج في التدريب او بدون اكل مناسب يعوضه صحياً عن المجهود اللى بيبذله فيبتدى يهجم عليك
وده غالبا بيكون حصان او ممكن فرسة ومش معروف عنها الهجوم او مش من طبعها كره الانسان او الهجوم الدائمودى سببها اولا واخيرا انت والتعامل الغلط ولازم تراجع نفسكالحصان لحم ودم زيك والياف عضليه لابد من التدرجفي التدريب حتى تسمح لعضلات جسمه انه يتقبل التدريب الاعلى تدريجياً سيبك من الغشامة وتفضل تقولى ده حصان
وده بيحاربوا عليه وده بيقطع ميت ميل في اليومكل الكلام ده حلو بس دربه صح بدون اجهاد ولا ضغطكله بالتدريج مش بالعافيةعافية انت تخسر وترجع تقول اصل الحصان.
الحالة الثالثة …..
ودى ال ١٠ % الباقية زى الحصان اللى كان في العرض وجاب الراجل تحته وقعد يقطع فيه هجوم مع كره للانسان بكل غل وحقد الحالة دى غالباً بتكون المهر في الحالة الاولى
مهر عنده شخصية بيلعب كتير ببقه تم معاملته غلط من قبل المربي او السايس او المدرب فبيحصل عنده عداءوالعداء هنا مش بيبقي للى ضربوه بس ..للاسف لاهنا عملوا حصان مريض نفسيا كاره للانسان عموماًوليه علاج وبياخد وقت شوية لانه بيحتاج اعادة ثقة من اول جديد وتعرفه انك مش هتأذية وفي الغالب بتحاول تبعد عنه الاشخاص المتسببين في الكلام ده
الحالة دى بتيجى ان المهر بيلعب فالسايس يكون عارف انه بيلعب ببقه فيبتدى اول م يروح يجيبه او يبدا يتعامل معاه يبتدى يضربه وهنا الغلط كله
في الحالة الاولى قلنا انك تعاقب بعد العض او لما يبتدى يلعب مباشرةمينفعش تبدأ معاه بضرب تقول اصله بيعض هنا انت بتخلق العداوة بينك وبينه انت لما ضربته هو مش عارف بيتضرب ليه
مينفعش تضربه على خبرات او افعال سابقه
في الحالة دى لو انت استمريت كده انت بتبنى عداوة يوميا لغاية م هيجى اليوم ويلاقي الفرصة وينتقم وممكن متبقاش معاك انت ممكن تبقي مع اى حد زى ماحصل وحصل وشفنا كلنا حالات هجوم خيل.
بقلم بدر امين
ربنا يحفظكم ويحفظ خيولكم
