كيف تتعامل مع كلبك

0

كيف تتعامل مع كلبك

 تكلمنا دكتورأباء حسن اليوم عن كيف تعامل كلبك
وقبل ما تقسى على كلبك افتكر: ممكن ناس ينصحوك تعامل كلبك بقسوة علشان يطيعك ومايعندش معاك بمعنى أصح بس قبل ما تفكر تسمع كلامهم أو تعاقبه بالضرب أو بالقسوة افتكر:
1. افتكر ان الكلب ده كان ليه حياة مع أمه وأبوه وإخواته وكل سعادته انه يتنطط معاهم وياكل اليوم بيومة وخلاص ده أقصى طموحه وانت أخدته وهو لسه مالحقش يشبع منهم لازم تفهم انة نفسيا هيتعب ولازم تحسسه بالأمان أكثر.
2. افتكر إحساس أمه وأبوه وجروهم بيتاخد منهم واعرف ان عندهم نفس غريزة الأمومة والأبوة زيك بالظبط فلازم تحافظ على الأمانة دي يا إما تسيبه في حضنهم.
3. افتكر ان الكلاب عندها مشاعر زي البني آدمين بالظبط ده مش كلام عاطفي وخلاص الأبحاث اللي اتعملت على مشاعر الحيوانات أثبتت ان الكلاب  من أذكى الحيوانات وأكثر الحيوانات اللي مشاعرها بتشبه مشاعر الإنسان يعني بيعرف حتى من وشك اذا كنت هتؤذيه ولا هتكافئه.
4. ماتستهونش بالضربة اللي بتضربهاله وهو عامل نفسه ماخدش باله وماوجعتهوش لا هو حاسس أوي بس مابيبانش على وشه زي ابنك لما بيتعاقب ويصرخ بصوت عالى.
5. افتكر قبل ما تاخده من حضن أمه وأبوه: عندك وقت عشانه؟ عندك تمن الدكتور لو مرض؟ هتقدر تستحمله وهو صغير ومش قادر يتحكم في التعود على الحمام ومش قادر يفهم عايزه يعمل إيه؟ هتستحمله وهو بيسنن وبيعض في كل حاجة ويبوظ لك حاجتك؟ هتستحمله وهو عايز يتجوز ويعمل بيبي في كل مكان وهو عارف ان ده غلط بس مش بإيده؟ تستحمل ما تخرجش كتير وماتباتش بره علشان هو مالوش غيرك ومستنيك؟
6. افتكر انه ماينفعش يكون لعبة لطفلك الجراوي شكلها بيكون كيوت أوي وأي طفل بيكون نفسه يلعب بيهم زي الدباديب اللعبة بس انت عندك عقل وبتفكر ولازم تفهم انك المسؤول الأول والأخير عن الكلب اللي هتاخده قبل حتى ما يتفطم. واسأل نفسك ألف مرة هتقدر تستحمل تربيته زي ابنك بالظبط مهما يعمل مش هترميه في الشارع؟
7. افتكر ان مش لازم تكون غني أوي عشان تربي كلب بس هو محتاج مصاريف مصاريف أكل ممكن تكون بسيطة لكن في مصاريف تطعيمات ودكتور لو مرض وساعات ممكن يحتاج عملية اسأل نفسك انت مستعد لكل ده وهتعامله زي ابنك ومش هتستخسر فيه؟ ولا الموضوع بالنسبة لك دبدوب بيجري عليك لما ترجع البيت؟
كيف تتعامل مع كلبك
كيف تتعامل مع كلبك

8. افتكر انه زي البني آدمين بيكبر في السن وهتلاقيه بيرجع طفل تاني ويعمل بيبي في أماكن مختلفة ويهوهو من غير سبب ومايبقاش قادر يتحرك وممكن يهوهو عليك انت شخصيا علشان مش فاكرك كل ده ممكن يحصل هتستحمله زي ماستحملك وهو صغير وسمع كلامك وكان مستعد يفديك بحياته؟

 

9. افتكر ان عمر ما حنيتك على كلبك أو كلب في الشارع معناها انك من العيال التوتو وانك لازم تعامله بقسوة عشان ترعبه وده دليل انك راجل جامد وعندك شخصية بالعكس ابتسامتك بس في وش كلب في الشارع ممكن تكون أدفى وأحلى حاجة حصلت له اليوم ده وماتعرفش حجم الثواب اللي جاي من وراها.
10. خليك فاكر ان فيه أفلام كتير بتشوه صورة الناس اللي بتحب الحيوانات انهم ناس تافهة أو متدلعة أو بيعملوا أنشطة غير مشروعة ومستخبيين ورا موضوع حقوق الحيوان وده بيخلي عقل الناس الباطن يشوف ان العكس هو الصح ويقسى على الحيوان أو يربيه بطريقة قاسية. افتكر كل ده قبل ما تقسى عليه، لأ، قبل ما تدخله بيتك من أصله.
اترك رد

لن يتم نشر عنوان بريدك الإلكتروني.